كنا زمان في المدرسة عندنا أغنية Aux Quatres Coins du Monde كانت بتعلمنا قبول الآخر بغض النظر عن لونه وعن دينه وبتعرفنا اني فيه تنوع في الثقافات ولازم نتعايش مع الثقافات الأخري . وكانت أحلامي المرتبطة بالإغنية دي إني عايزة أسافر البلاد دي كلها عشان أتعرف علي الثقافات المختلفة . لكن عمر ما خطر في بالي إني العولمة Globalizationهتعمل فيا العملة دي ، علاقتي بزمايلي في العمل .....اللي موجودين حواليا واحتمال رؤيتهم وجها لوجه تقريبا 100% ممكن بمنتهي البساطة ولا أشوفهم ولا أقولهم حتي صباح الخير.....والغريب إني علاقتي بحبيبة اللي في تونس و يوسل في تركيا وجانين في جنوب أفريقيا .....وأسما في المغرب ...أقوي بكتير....شغلنا مع بعض ....مديرينا نفس الأشخاص بنسال علي بعض وباطمن عليهم وعلي عيلتهم وممكن اعزمهم في فرحي كمان....والغريب انه مع اختلاف ثقافتنا عن بعض أنا بتواصل معاهم أحسن بكتير من الناس اللي حواليا اللي تقريبا علاقتي بيهم أسطح من السطحية .....ده حتي البنت بتاعة الكول سنتر اللي بيعملنا ال IT Support طلعت موجودة في الفلبين.....ولما قولتلها أنا في مصر قالتلي وفضلت تشرحللي قد ايه نفسها تزور وادي الملوك وأنها مبهورة بالفراعنة.....واتصاحبنا علي بعض في دقيقتين. أنا مش مستغربة اني في القرن الواحد وعشرين بكلم أركان الأرض الأربعة في نفس الوقت لكن استغرابي هو أني زمايلي الخياليين اللي مش باشوفهم هم زمايلي الحقيقين والعكس صحيح !!!!!! حواجز الثقافة والمكان والشكل طبعا كلها مختفية ....بينا تواصل إنساني طبيعي وسلس جدا من غير أي عقد ....روح العمل الجماعي وتحقيق الاهداف ومفيش مجال للحكم علي بعض بشكل سطحي ومظهري....غريبة أوي.....الغنية كان لازم تقوللي إني وراء اختلاف الثقافات والأعراق والألسنة والمظهر والمرجعيات....ممكن ألاقي صداقة حقيقية علي المستوي الإنساني البحت......وهو ده أعمق مستوي .
